DEBAK, 3 April: Jaku tuduh ke ngumbai nadai agih belanja diberi ungkup tuju penumbuh PAWE sebedau tu kebendar nua siti jaku tuduh ke enda betul.
Menteri Pemansang Indu, Ruang Bilik enggau Raban Bansa, Dato Sri Nancy Shukri madah mensia mayuh ke bisi ati deka numbuhka PAWE ba menua diri sida patut ngaga peminta sereta mantaika ripot ngagai raban opis menteri dulu sebedau sebarang agih belanja ungkup tuju nya dikemendarka.
“Kitai deka nemu sekalika mensia mayuh ba endur nya nyengala amat deka, nyadi kitai minta ngambika mensia mayuh ba endur nya numbuhka nya laban enti iya diberi agih belanja tumu tang sida nadai ngaga nenama nyadi tu ulih didawa salah.
“Nya alai enti ngumbai kami nadai meri enda betul laban sida mesti ngaga peminta ni pengelama udah ditumbuh sepenyampau RM100, 000 ba taun tu.
“Udah nya sida ngatur aktiviti, anjung mih ripot peminta ungkup agih belanja enggau udah nya kami deka meri enda ngelui ari RM50, 000,” ku iya rambau dirandau pemberita ba sebengkah program ditu pagi tadi.
Opis Menteri Pemansang Indu, Ruang Bilik enggau Raban Bansa ku iya seruran sedia meri peransang ngagai genap kaban PAWE indu ba selampur menua ngambika regas agi ngambi bagi ba bemacham bidang lebih agi bidang bekaul enggau sosio ekonomi ruang bilik sida empu.-TVS
