KUCHING, 3 April: Sitak Kunsil Nengeri (DUN) Machan begunaka sebuah Palan Endur Ngumpul Produk Betanam Betupi (APCC) dikena ngempuruka produk-produk betanam betupi ke diasilka perayat lokal ba endur nya.
Kaban Kunsil Nengeri (ADUN) Machan, Allan Siden Gramong madahka, betanam betupi nyadi aktiviti ekonomi ke pemadu besai ungkup rayat ba sitak nya tang sida nadai ngembuan pengatur ke manah ke ulih mantu ngelaluka enggau nyual produk sida.
Beduduk ari nya, Allan madah raban sida udah ngaga peminta enggau nerima timbal ke manah ari raban ke bekaul senentang status pemadu baru senentang palan nya semina deka ditemu ba aum DUN Sarawak ke deka datai tu ila.
“Aku bisi minta ungkup DUN nya lalu aku melabaka agi ba renggat turai tukuh tang kitai begunaka tu enggau jampat.
“Kekadang ba Kanowit kami bisi pasar tamu ke alai orang meli maya pagi, maya lemai mayuh laluh. Sayau.
“Tu meh timbal ari rayat tebal agi sida ke beumur 50 taun ke atas. Sida anak semua kereja, kereja ba luar, ngagai Sibu.
“Tang ungkup sida pan deka bisi duit diri empu, Taja pan mimit penatai pemisi. Deka bejual ba pasar kanowit ukai nya mayuh.
“Untung sehari pan dua tiga kilo. Nya aja ke ulih dijual ke bukai dibuai. Nya kebuah perintah mesti berundingka APCC di Kanowit,” ku iya.
Udah nya ngelansa pasal pengawa nengkira diri ungkup DUN ke deka datai tu, Allan madahka kelimpah ari APCC iya mega deka mantaika isu infrastruktur ba sitak DUN Machan nyengkaum bekal ai, bekal karan, akses jalai, enggau telekomunikasyen.
Kelimpah ari nya, Allan madah isu ke pemadu besai iya nya bekal ai beresi.
“Ba DUN aku palan ke pemadu berat begunaka ai iya nya di Majau. Sida tu endang begunaka bekal ai beresi laban sida ba tisi jalai.
“Jalai Kapit-Kanowit. Karan bisi, jalai bisi tang nadai ai. Diatu sida bepanggai ba ai ujan.
“Nyadi, nya mih pekara ke deka dibantaika ba ADUN ila. Aku deka mekuhka baka ni deka ngemansangka endur tu awakka bisi bekal ai laban dia bisi sekula, rumah panjai lebih 20 iti.
Bepelasarka rikod, penyampau rayat di DUN Machan diatu iya nya urung 16,000 iku.-TVS
