SARATOK, 2 Mei: Pejalai projek pemansang ke ngaul Projek Transformasyen Menua Pesisir (RTP) enggau Projek Pemansang bukai di Krian dipejalaika enda ngira penemu pilitik ke disukung pengani ke bekaul.
Kaban Kunsil Nengeri (ADUN) Krian Friday Belik madah, ulah sekeda raban ke sengaja nempa petenah nuduh pengawa nyadung RTP nitihka penemu politik kebendar enda betul.
Nya kebendar ku iya digaga dikena ngelimpangka runding rayat kelimpah dikena nguji meri peragam ke enda manah ngagai pengari rayat Gabungan Parti Sarawak(GPS) di Krian.
“Kami ngungkupka kita projek enda ngira sapa-sapa, sekalika kita nya ngundi aku tauka enda maya bejaku ba diwan (DUN) din…aku minta dua tiga juta kena aku meri penyukung GPS nadai aku munyi nya.
“Tang aku madahka kena ngaga pemansang ngagai kami di Krian, nyadi nya ukai semina ungkup penyukung GPS aja tang ungkup semua.
“Aku enda bechiping tang ni maya diberi ni maya ke diungkup bepanggai ba pemisi agih ke diberi kitai deka meda ni pemerat,” ku iya.
Friday madah munyi nya lebih ningkah jaku petenah sekeda raban ke ngumbai Projek RTP di Krian semina diberi ngagai rumah panjai tauka sida penyukung kuat GPS aja rambau bejaku bejadika Projek Transformasi Luar Bandar (RTP) di Rumah Panjang Jenalius Unchie Sungai Brangan Saratok ditu, empai lama.
Ku iya, penyadi nya udah bisi dipeda, mayuh rumah panjai ke dulu suba endang nyadi kubu kuat penyakal mega nerima Projek RTP kenyau iya udah nyadi pengari rayat Krian.
Berebak enggau nya, Friday nangkan semua Tuai Raban Bansa enggau Tuai Rumah (KMKK) di Krian anang sesekali ngereja ulah ke ngelanggar atur ke udah ditetapka ungkup kita.-TVS
