PAKAN, 2 Mei: Pemanah enggau penyelai rampa menua asal di Pakan bisi penau dikemansang nyadi puncha ekonomi perayat lokal, ketebal agi dalam sektor dagang temuai.
Kaban Kunsil Nengeri (ADUN) Pakan, Tan Sri Wiliam Mawan Ikom madahka, entara aktiviti ti ulih diatur ba sitak nya nyengkaum neresa kampung, bemarin, bekayak sereta bisi ‘home stay’ alai bala temuai bemalam.
Nampung berita Unit Komunikasyen Perintah Sarawak (UKAS), iya madahka, semua aktviti nya tadi tau meri asil penatai pemisi ngagai rayat, lebih agi ngaul pemekuh industri dagang temuai.
“Semua kita mesti ngintu enggau ngetanka pemanah rampa menua sereta ekosistem ti udah bisi di pelilih Pakan,” ku iya.
Mawan mansutka jaku nya rambau Program Belepa Tuai Raban Bansa enggau Tuai Rumah (KMKK) sitak Nanga Wak ba Diwan Tebuka SK Nanga Wak apin lama.
Beduduk ari nya, Mawan meransang semua rayat enda milih renggat bela besaup ngintu, nyaga enggau ngetanka pemanah rampa menua asal di pelilih Pakan.
Iya ke mega nyadi penyanding penemu ba Opis Premier Sarawak (Industri Pemakai, Komoditi enggau Pemansang Wilayah) ngelalau rayat Pakan ngambika enda ngamahka rampa menua, baka muai sampah enggau bangkai jelu ke dalam sungai dikena nentuka pemeresi sungai enggau kandang endur ba dia semampai tejaga.
“Meri pemereti ngagai rayat pasal pengawa ngintu enggau nyaga rampa menua sigi bisi pemar, tang pekara nya ulih dikemujurka ti dipejalaika nguna chara ke betul,” ku iya.
Iya nerangka, tangkup pengawa bala KMKK mega mesti setipak enggau semua pelasar perintah sereta pengari rayat di sitak sida, ngambika buah pemansang ulih diasaika rayat seraya mantu nyungkak enggau nambahka tikas ekonomi komuniti lokal.
Tandu iya, pemansang infrastruktur ti dikerembaika perintah mega udah mayuh meri pemaik ngagai rayat sekalika ari aspek bantu finansial tauka bantu ke diguna dalam komuniti.-TVS
