SRI AMAN, 29 April: Siku lelaki lunggar umur dikenuku bebadi nyawa ba penusah aksiden ke ngaul sebuah lori kargo enggau motosikal ba Kilometer 23 Jalai Sri Aman Kuching ditu pagi tadi.
Nitihka penerang ari Tuai Polis Pelilih Sri Aman DSP Mathew Manggie, tudah ke bebadi iya nya Angki Aling beumur 66 taun asal ari Skim Skrang dikenuku mutus seput ba palan penusah nyadi laban balat bakal ba pala.
“Asil pansil tumu penusah nyadi bepun ari tudah ke deriba motosikal puntan nagang motosikal sereta ngujungka ngelanggar tayar belakang lori kargo ke paking ba tisi jalai sepiak kiba ketegal rusak.
“Tudah sebedau nya dipadahka bejalai lurus datai ari Sri Aman deka nuju ke Pasar Lachau.
“Dulu ari nya mega, kelindan lori bisi ngengkahka dua iti kon segitiga ngena dan kayu sereta ba takah ke chukup ba atas jalai nya,” ku iya seraya madahka deriba lori kargo ke beumur 50 taun nya nadai sebarang bakal.
Maya penusah nyadi gaya hari benung ujan lalu kes dipansik nitihka Seksyen 41 (1) Akta Pengangkutan Jalan 1987.-TVS
