SARATOK, 29 April: Sebuah diwan baru beungkus RM500, 000 deka digaga ba Kaki Wong Saratok ungkup pengelantang rayat mayuh ke diau besemak, ku Friday Belik.
Kaban Kunsil Nengeri (ADUN) Krian nya madah, agih belanja dikena ngaga diwan baru ke diberi nama Diwan Komuniti Kaki Wong nya udah dikemendarka perintah nengeri nengah Turu Kaunsil Gerup Wang Sitak Konsesi Kampung (LKWKKH).
“Berita manah ungkup kitai ditu (Kaki Wong) deka digagaka kitai diwan baru ngena turu LKWKKH iya nya dikena mantu nulung menua ti kala alai orang ngereja batang tauka ngambi kayu.
“Perintah Sarawak udah ngungkupka RM500,000 dikena ngaga baru Diwan Komuniti Kaki Wong,” ku iya.
Friday madah munyi nya maya bejadika Palan Aktiviti Pengerai Komuniti Kaki Wong Babang, kemari.
Beduduk ari nya, iya minta pengani ba sitak nya patut numbuhka siti komiti khas dikena nentu pengawa ngaga diwan baru nya bejalai enggau mujur.
Ngelansa pengerami sehari nya, Friday madahka pengawa numbuhka baru Palan Pengerai Komuniti ba Kaki Wong Babang siti pengawa ke chukup badas.
Ku iya, pengawa nya mandangka komuniti ba menua pesisir udah ngembuan tikas penyedar ke chukup tinggi bekaul enggau pengawa nyaga pengerai diri.
“Kita ke di menua tu tadi udah bisi runding deka ngangkatka baru Klinik tauka Palan Pengerai Komuniti ba menua pesisir ke udah kala ditumbuhka ba menua kitai di Kaki Wong ditu suba.
“Nyadi tu pengawa ti manah lalu aku muji bala Tuai Rumah ditu ke diiring Penghulu laban udah setuju deka numbuhka baru Palan Pengerai di Kaki Wong,” ku iya.
Tandu iya, penumbuh sesebengkah palan pengerai sekalika ba renggat nasional, nengeri, bagi menua enggau pelilih endnag siti pekara ke chukup beguna dikena nagang pengerekai penyakit berampit.
Palan Pengerai Komuniti Kaki Wong Babang enti udah dibuka ila deka meri pemaik ngagai urung 15 buah rumah panjai ke besemak.
Sama bisi datai ngulu pengerami nya Tuai Unit Pengerai Primer Opis Pengerai Pelilih (PKD) Saratok John Party Duat, Pegawai Klinik Pengerai Nanga Budu Dr Muhamad Hafizudin Fazri Suhailan.-TVS
