SRI AMAN, 29 April : Operasyen Nyidi sereta Mantu (SAR) lelaki lunggar umur ke dipelaba lenyau dalam kampung maya ngiga tubu kenyau Hari Minggu siti ke udah diketu pukul 5 lemai kemari.
Tuai Balai Bomba enggau Penyah Penusah Sri Aman Penulung Penguasa Bomba (PPgB) Andrew A/L Vengitasamy madah, pemutus nya digaga beduduk ari nadai sebarang bekau baru ditemu ba palan penusah nyadi sepengudah seminggu operasyen SAR dipejalaika sereta pengudah randau enggau raban polis, tuai ejensi ke bukai enggau mega Tuai Rumah Suyong sereta orang ke sebilik enggau tudah ke lenyau.
“Operasi Nyidi enggau Mantu sekumbang tujuh hari diperati Komander Operasyen ASP Leonard anak Melaka enggau Sapit Komander Operasyen Penulung Penguasa Bomba Andrew A/L Vengitasamy begulai enggau bala tuai ejensi bekaul udah berandau enggau Tuai Rumah Suyong sereta sida sebilik udah setujuka operasyen SAR diketu sehari tu (Hari Minggu) 28 April 2024 pukul 5 lemai laban nadai sebarang bekau baru ba palan penusah nyadi,” ku iya.
Iya mansutka jaku nya maya dirandau pemberita kemari.
Ku tandu iya, operasyen SAR deka disambung sebarang maya enti bisi tetemuka bekau baru ba palan penusah nyadi.
Kena Hari Minggu siti nyin kemari, siku lelaki ke udah lunggar umur ari Rumah Panjai Suyong, Stumbin ditu diripotka lenyau.
Maya hari iya lenyau, tudah dipadahka nurun ari rumah ngena sebuah motosikal sereta bebaju pandal bechura bekengkang gadung biru, betanchut panjai chelum enggau bekasut but bechura kuning.
Antara ejensi ke bela nyaup operasyen tu iya nya Raban Polis Diraja Malaysia (PDRM) Sri AMan, Raban Penyaga Orang Periman Malaysia (APM) enggau pengani rumah panjai ke besemak.-TVS