SARATOK, 29 April: Bala kaban Parti Pesaka Bumiputera Bersatu (PBB) Pampang Krian diperansang terus negapka kerejasama enggau pengari rayat Gabungan Parti Sarawak (GPS) ba sitak nya.
Tuai PBB Pampang Krian Bell Bernard Aggan mada sukung enggau kerejasama tegap nya chukup beguna dikena nentuka genap agenda pemansang ke udah enggau benung dilanggur pengari rayat di Krian ulih dikemujur.
“Kitai PBB pechayaka atur bekunsi kuasa lebih agi di Saratok ditu.
“Nya alai, aku minta kitai kaban PBB mesti bekerejasama enggau terus nyukung Yang Berhormat kitai ari Krian Friday Belik ngambika iya ulih terus nyadi pengari rayat ditu udah tu…setuju,” ku iya.
Bell ke mega Sekretari Politik ngagai Premier Sarawak madah munyi nya rambau Pengerami Makai Lemai Kaban PBB Pampang Krian ditu, empai lama.
Ku iya, PBB Krian mega seruran nyukung polisi-polisi pemansang ke dirandang Premier Sarawak Datuk Patinggi Tan Sri Abang Johari Tun Openg lebih agi bekaul enggau Pelin Strategi Pemansang Udah Covid-19 (PCDS) 2030.
Sekumbang udah ditumbuh kenyau ari taun 1980, PBB Pampang Krian diatu udah bisi 4,200 iku kaban.
Sama bisi ngulu pengerami nya Sapit Tuai PBB Pampang Krian Kaunselor Edmund Uda Meling, Sekretari PBB Krian Leonard Jambu sereta bala ke bukai.-TVS
