MIRI, 28 April: Institusyen Latih Khas ungkup pelajar Bidang Kapal baka Pelita Maslaut dipeda bisi daya nambahka taka pemansang peminta industri kapal sereta nyungkak asil ekonomi perayat lokal.
Sapit Menteri Pengangkut Sarawak, Dato Henry Harry Jinep madahka, bemacham kus bisi disediaka dikena nangkup peminta guna kelasi dalam begian dek tauka injin lebuh sida bejalaika servis dalam bidang kapal.
Ku Harry, pengawa baka nya ulih mantu perintah Sarawak mutarka penanggul suntuk kelasi tauka pelayar lokal seraya nangkup peminta industri kapal ke udah bisi ba menua tu sekalika ba dalam tauka luar nengeri.
“Aku berasai temegah laban bisi Institusyen Latih Khas ba dalam pelajar bidang kapal sekalika ba begian dek tauka injin laban ulih mantu nambahka taka pemansang industri kapal ketebal agi di Sarawak.
“Pia mega di Malaysia lalu ulih nyungkak asil ekonomi perayat lokal sekalika nganjung anak sida ngambi kus ke bisi disediaka ba Pelita Maslaut Sdn Bhd,” ku iya.
Iya mansutka jaku nya rambau Program Graduasyen Perantis Marin Dek Pelita Maslaut Miri Sdn Bhd kemari.
Pelita Maslaut diatu benung ngaga sebuah kampus baru ke ditaga tembu tengan bulan June tu sereta disikap enggau infrastruktur ke ulih muat 400 iku pelatih dalam siti-siti timpuh.
Ba pengawa graduasyen nya, bisi 17 iku perantis marin dek nerima setipikit, dua setipikit anugerah khas ke diberi ngaul Setipikit Pelatih Pemadu Manah disua ngagai Al-Haqkim Furqan Ramzan sereta Setipikit Nembiak Dikeandalka disua ngagai Ting Seng Lawrence.-TVS