ENGKILILI, 28 April: Penyadi ujan bangat kenyau Hari Lima sereta segang ai Batang Lupar ngujungka sekeda rumah panjai di sitak Engkilili dituntung penusah bah tunggal.
Tuai Balai Bomba enggau Penyah Penusah Sri Aman Penolong Penguasa Bomba (PPgB) Andrew Vengitasamy madah taja pia nadai Palan Pengenduh Sementara (PPS) dibuka beduduk ari asil patau naka pukul 4 lemai Hari Minggu tikas ai bah udah surut sereta pengawa matau diketu naka pukul 5.15 minit lemai tadi.
“Balai Bomba Sri Aman nerima kangau telefon ari Tuai Rumah Chundie madahka pasal kandang endur kena penusah ampuh bah di sitak Engkilili, Sri Aman ngaul 22 pintu pengari rumah panjai.
“Tikas ai bah diripotka bisi tama ngagai dalam rimah penalam dua kaki enggau penusah ampuh bah tu berengkah nyadi Hari Lima, 26 April.
“Asil pansik tumu penusah ampuh bah nyadi beduduk ari segang ai ari Sungai Batang Lupar enggau ujan bangat berunggu.
“Pekara nya ngujungka pengani rumah panjai minta sah raban bomba datai matau kandang endur ke bekaul,” ku iya maya dirandau pengari TVS, Hari Minggu.
Nangkan ke nya, bantu bekal pemakai udah disadung ngagai raban ke tekeruga ampuh bah iya nya ngaul 193 pintu ruang bilik.
Antara rumah panjai ke kena penusah ampuh bah tu iya nya Rumah Maria Merbong (25 pintu), Rumah Ayum Nyaring Ensurai (31 pintu), Rumah Sidi Maling, Geligau Ulu (31 pintu), Rumah Chundie Nyelang, Geligau Ili.
Rumah panjai bukai ke bela kena penusah bah sereta udah dianjung bantu pemakai iya nya Rumah Ladan Tabut Ulu, Rumah Karim Tabut, Rumah Jerukan Tembong, Rumah Harry Tembong, Rumah Jengin Kejemut, Rumah Kumbang Lipat enggau Rumah Rebecca Lipat Ili.
Berebak enggau nya, Palan Servis N.33 Engkilili meri terima kasih ngagai ejensi perintah ke udah bekenanas bejalaika pengawa matau sereta nyadung bantu ngagai mensia mayuh ke tasah bah di Engkilili.
Antara ejensi ke udah ngesah penusah tu iya nya Opis Pengintu Pengelantang Raban Bansa (JKM) Sri Aman, Raban Bomba enggau Penyah Penusah Sri Aman, Raban Penyaga Orang Periman (APM) Lubok Antu enggau Raban Bomba Volunteer (PBS) sitak Lubok Antu enggau Engkilili.-TVS
