KATIBAS, 27 April: Perayat lebih agi semua nembiak sekula ba menua ulu enggau menua pesisir diperansang mesti ransing belajar nyengkaum patut nemu pasal polisi ti benung dipejalaika perintah Sarawak jam ke diatu.
Kaban Kunsil Nengeri (ADUN) Katibas, Lidam Assan madahka, entara pemansang ti benung diserungkai enggau dirandang Sarawak baka kuasa gadung enggau ulih dikemaru (hidrogen), Nguna enggau Nyimpan Karbon (CCUS), ngaga tekat ai anyut (cascading dam) sereta teknologi ke ulih ngeluarka kuasa ke enda ngeruga pemanah rampa menua.
“Opis Premier Sarawak diatu madahka deka nguna kurang lebih 500 iku injinir ti pandai enggau landik dalam pemansang industri baru,” ku iya madah rambau bejadika Pengerami Anugerah Nembiak Lati 2022/2023 Sekula Sekondari (SMK) Katibas Hari Lima tu tadi.
Lidam mega nerangka senentang perintah Sarawak ba baruh iring tuai Premier Sarawak Datuk Patinggi Tan Sri Abang Johari Tun Openg bejalaika inisiatif nyendiaka pelajar tinggi ngagai nembiak Sarawak ti bisi potensyel nampung pelajar ba tikas universiti ke dipenggi perintah Sarawak.
“Ngagai bala kita nembiak ti ngambi peresa Sijil Pelajaran Malaysia (SPM) taun tu, nguna manah peluang baka tu.
“Taun baru (2025) kita masuk pom enam baruh, udah nya pom enam atas (2026). Taun 2027 kita tau nguji minta pelajar pechuma ke diberi perintah Sarawak,” terang iya.
Beduduk enggau nya, iya nyemetak madahka nadai kebuah apai indai enda ulih nganjung anak sida nampung pelajar ba renggat Institusyen Pelajar Tinggi (IPT).
“Isu suntuk belanja ukai agi nyadi penanggul ke tau nekul apai indai enda meransang anak sida ti bisi pemandai belajar ba universiti,” tandu iya.
Nitihka rikod, entara Palan Pelajar Tinggi (IPT) ti dipenggi perintah Sarawak ti disadang deka bulih pemaik ari inisiatif tu ila iya nya Swinburne University of Sarawak, Curtin University Sarawak, Universiti Teknologi Sarawak, Kolej Universiti ICATS enggau CENTEXS.-TVS
