KUCHING, 27 April: Pengelantang nembiak ti begunaka bantu khas terus dikenatika perintah Sarawak nengah Opis Menteri Pemansang Indu, Nembiak Mit enggau Pengelantang Komuniti (KPWK).
Beduduk ari nya, enam agi palan nembiak ti begunaka bantu khas tauka dikumbai Palan Sereba Intervensyen Tumu tauka One-Stop Early Intervention Centre (OSEIC) Sarawak deka dibuka ba serata Sarawak manggai taun 2030.
Menteri ti nguasa KPWK, Dato Sri Fatimah Abdullah madahka, langgur nya nyerangkung ngaga palan nya ba Bintulu taun 2025, Betong (2026), Lawas (2027), Kapit (2028), Serian (2029) sereta Kota Samarahan (2030).
Penumbuh palan ba tetiap bagi menua nya deka dikemujurka pengudah digaga ba Kuching enggau Dalat serata deka ditumbuhka ba Miri dalam ujung taun tu.
“OSEIC iya nya siti inisiatif sengkaum rama dalam Strategi Pemansang Pasca COVID-19 (PCDS) 2030 ti deka nentuka nadai siku rayat di wilayah tu dikelaung ari ngasaika pemaik ke dibai perintah,” ku iya madah rambau Aum Komiti OSEIC Hari Lima tu tadi.
Fatimah ke mega chairman komiti nya nerangka, OSEIC di Metro City, Matang udah berengkah dibuka kena 30 Oktober 2020.
Kenyau dibuka, penama nembiak mit ke palan nya seruran penuh enggau kapasiti 100 peratus ti ngaul 489 iku nembiak mit naka 31 Mac 2024.
“Perintah Sarawak udah ngungkupka agih belanja penyampau RM9 juta dikena ngemansangka tujuh unit begunan OSEIC Kuching,” tandu iya. – TVS
