SARATOK, 26 April: Isu pejalai projek ba baruh Skim Turu Peminta Tambah Tauka Laun (ALAF) ba sitak Kunsil Nengeri (DUN) Krian ti enda ngemuaska ati diatu deka dibai ngagai Opis Menteri Utiliti enggau Telekomunikasyen (MUT) Sarawak.
Kaban Kunsil Nengeri (ADUN) Krian, Friday Belik madahka, tu beduduk ari naka diatu semina tujuh aja ari penyampau semua 126 peminta Projek ALAF bagi sitak DUN Krian udah dikemendarka.
“Ungkup projek bekal karan ba baruh ALAF, ba baruh DUN Krian, kami udah nganjung 126 peminta, lalu naka diatu, kami semina nemu tujuh aja peminta ti udah dikemendarka, nyadi bisi mayuh agi ti patut ditanya kami enggau opis menteri,”ku iya rambau dirandau pengari TVS ditu, kemari.
Ku tandu Friday, pejalai projek nya mesti dipejalaika raban ke bekaul enggau jampat laban raban peminta udah lama nganti.
Isu ke bukai ti deka dibantaika iya ngagai MUT Sarawak udah tu ila iya nya isu bekaul enggau akses bungkur internet serete telefon enggau bekal ai beresi.
ALAF iya nya sebengkah ari projek ungkup rayat iya nya ngagai sida ke baru ngentak rumah baru lalu deka minta disambung bekal karan.
Atur minta ALAF iya nya rumah ke udah tembu sereta likun. Ungkup premis komersial, stor sereta langkau arau sigi enda diterima bulih skim tu.-TVS