KUALA TERENGGANU, 25 April: Bisi 12,613 iku atlit enggau pegawai ari semua nengeri deka begempuru ba Sarawak nyerumba Pekit Lumba Malaysia (SUKMA) Ke-21 Sarawak 2024 ti deka diatur bulan Ogos tu ila.
Sapit Menteri Pemansang Indu, Anak Mit enggau Pengelantang Komuniti Sarawak Datuk Mohd Razi Sitam madah, penyampau nya nyengkaum atlit enggau pegawai Para SUKMA ke bisi 2,000 iku.
“Penemuai kami serak tu ke Pantai Timur laban deka ngarika Perintah Sarawak ngangauka nengeri-nengeri di selampur Malaysia.
“SUKMA serak tu deka nyadi pemadu besai laban iya mantaika mayuh pekit ari sebedau tu lalu semua iya kami nyaran lebih 12,000 atlit enggau pegawai selampur Malaysia nyengkaum Brunei,” ku iya.
Razi diatu benung ba Terengganu nguluka pejalai ngelawa nengeri-nengeri ba Pantai Timur Semenanjung nyengkaum Melaka enggau Nengeri Sembilan madah munyi nya maya ditelefon TVS, Hari Dua tu tadi.
Ku iya, tuju penemu nya laban deka ngangauka nengeri ba Pantai Timur Semenanjung ngambi bagi sereta datai ba pengawa bejadika SUKMA enggau Para SUKMA Sarawak 2024.
Naka tu bisi 15 buah nengeri, Wilayah Persekutuan nyengkuam menua Brunei Darussalam udah ngenuku ke diri masuk pekit nya.
Pekit SUKMA serak tu iya nya pemadu besai dalam sejarah laban ngaul 37 leman lumba lalu bisi 484 achara deka dipekitka.
SUKMA Sarawak 2024 deka diatur berengkah 17 nyentuk 24 Ogos ditangkan Para SUKMA deka berengkah 20 nyentuk 28 September 2024.
Sama bisi nyereta pejalai nya Sapit Menteri Nembiak, Lumba enggau Pemansang Pedagang Sarawak Datuk Dr Ripin Lamat.-TVS
