KUCHING, 22 April : Sepital Besai Sarawak (HUS) dirintai nyadi entara 28 sepital ti pemadu manah ba Malaysia baka ti udah dipadah dalam artikel ‘World’s Best Hospitals 2024 Newsweek’.
Sapit Premier Sarawak, Datuk Amar Dr Sim Kui Hian madahka HUS ngerikodka skor 71.05 peratus enti dibanding enggau sepital Gleaneagles Kuala Lumpur ti ba rintai ti pemadu tinggi enggau skor 89.50 peratus, ku iya nengah penerang ba laman Facebook.
“HUS ukai semina nyadi empat sepital ti pemadu manah di empu perintah, tang nyadi siti sepital Borneo ke ba penuduk 28,”ku iya.
Ku Dr Sim ti mega Menteri Pengerai Mensia Mayuh, Pengawa Berumah enggau Perintah Lokal, nya madahkah temegah ati iya senentang asil ti pemadu manah.
“Terima kasih ngagai semua staf HUS, enggau meri tabi puji ngau basa.
“Ngambi ka sida ulih terus lati ba luar runding ti bisi tatak ketegal penanggul belanja ari Opis Menteri Pengerai,”ku iya.
Ku tandu Dr Sim, tu tau nyadi kebuah mensia mayuh patut nyukung sereta terus ngangkatka pemanah nama HUS.
Nya alai perintah besai patut nambahkah agi belanja ngagai lima peratus ari Pemansut Kasar Dalam Menua (KDNK) baka ke dipadah ba dalam keretas putih.
Dibaruh iring Premier Sarawak Datuk Patinggi Tan Sri Abang Johari Tun Openg, perintah Sarawak terus bebendar nagih hak autonomi pengerai baka ke udah dipekat dalam Sempekat Malaysia 1963 (MA63), ku iya.
Dr Sim madah pekara nya chukup beguna dikena ngerumban projek ngemanah Klinik Pengerai kelimpah nambahka sekeda sepital laban ba menua kitai tu semina empat ari 28 sepital aja ti udah dirintaika.
Ungkup rikod, tiga sepital ti diempu Opis Menteri Pengerai iya nya Sepital Kuala Lumpur ti ba penuduk keempat, Sepital Besai Sarawak ba penuduk ke-22 enggau Sepital Putrajaya ba penuduk ke-26.
Siti agi sepital ti diempu perintah dirintai manah iya nya Palan Perubat Universiti Malaya. – TVS
