ROBAN, 22 April: Pemujur Sarawak nyadi entara tiga nengeri ke pemadu mayuh meri asil dalam Pemansut Kasar Dalam Menua (KDNK) menua siti pekara ke chukup ngemegah.
Kaban Dewan Negara Senator Pele Peter Tinggom madahka, pemujur nya ulih dijapai ketegal Sarawak bisi siku tuai perintah ke pintar baka Premier Sarawak Datuk Patinggi Tan Sri Abang Johari Tun Openg, udah ngelangkar strategi ekonomi ti ngujungka penatai pemisi nengeri tu terus nambah.
“Tu sigi pekara ke chukup ngemegah sereta diaku nengeri bukai enggau perintah Malaysia.
“Siti kebuah kitai nyadi tiga entara nengeri ke pemadu mayuh meri asil KDNK menua iya nya ketegal pemintai tuai perintah megai Sarawak baka Premier Sarawak.
“Nengeri Sarawak mujur bulih asil baka ke ditemu kitai taun 2022 penyampau RM12 bilion enggau taun 2023 bulih RM13 bilion.
“Nya ketegal pemintar iya ngiring enggau ngembing Sarawak sereta pengaya asil pengeraja asal kitai ba ditu.
“Pemintar Premier mega mujur matak pemeranak puku ti mantu nyungkak ekonomi Sarawak,” ku iya maya ngulu sebengkah pengerami ditu, empai lama.
Nangkan ke nya, Pele madah iya deka terus nyukung pengawa Premier Sarawak ngemansangka ekonomi Sarawak bepelasarka kapasiti iya ke nyadi siku ari kaban Diwan Negara.
Sebedau tu, ku Tuai Pakar Ekonomi Bank Dunya Malaysia madah, nitihka rikod Opis Statistik Malaysia (DOSM) ngayanka Sarawak meri asil penatai pemisi penyampau 9.75 peratus dalam KDNK menua.
Sarawak entudi nengeri Selangor enggau Wilayah Persekutuan Kuala Lumpur ti bela ngirikodka 25.54 enggau 16.22 peratus.-TVS
