KUALA LUMPUR, 22 April: Komiti Komunikasyen enggau Multimedia (MCMC) ngelalau raban apai indai patut nutup akaun media rama anak sida ke beumur baruh 13 taun.
Menteri Komunikasyen, Fahmi Fadzil madahka, kebuah pia laban MCMC beratika nembiak ke beumur baruh 13 taun enda berapa manah nguna laman media rama.
“Jaku tangkan ari MCMC, anak ti baruh umur 13 taun enda dikemendarka ngembuan akaun TikTok…akaun Instagram enggau akaun media rama ke bukai.
“Nyema bisi, apai indai padah ke ngagai aku lalu kitai patut nutup akaun nya,” ku iya.
Fahmi nerangka, isu pasal pengempu akaun media rama maya diatu iya nya raban media rama nyerahka penuh rejister muka akaun ngagai penguna ti nadai nguna chara kena ngesah umur sida lebih ari penetap ti dikemendarka.
Berindik ari nya, raban iya udah ngatur siri aum enggau raban ke bekaul baka meta ti ngatur aplikasyen Facebook, Instagram enggau Whatsapp sereta Telegram dikena mantaika langgur sida kena mutarka isu pengempu akaun media rama ba raban nembiak beumur baruh 13 taun.-TVS
