SARATOK, 19 April: Sitak Kunsil Nengeri (DUN) Saratok begunaka sebuah agi taba tugung uras ke baru dikena nangkup perengkaguna nya ke chukup diguna perayat ke diau ba sitak nya.
Kaban Kunsil Nengeri (ADUN) Krian Friday Belik madahka taja pia naka diatu nadai sebarang perambu ti diterima ari raban Kaunsil Pelilih Saratok sepengudah isu nadai taba tugung uras dipadahka ba aum DUN kenyau dua taun ke udah.
“Pekara tu kala dipadahka lebuh aum DUN.
“Enti enda salah ingat aku, pekara ti kala dibantai ke aku 2022 lalu kitai mega kala madahka ngagai raban kaunsil ngambika ngiga taba ke engkeman dikena nganti taba ke udah bisi diatu.
“Nyadi sida ari opis kaunsil benung ngiga taba ke engkeman laban naka diatu kitai bedau bulih perambu ke nyemetak ari Kaunsil Pelilih Saratok,” ku iya.
Friday mansutka pekara nya sepengudah ngulu aum Program Bantu Lisin Deriba (BLM) Lisin B2 MyLisin ba bilik aum Opis Kaunsil Saratok, empai lama.
Naka diatu Pelilih Saratok semina ngembuan siti taba tugung uras iya nya Taba Tugung Uras Perabun.
Ngelansa silik pasal Program Bantu Lisin Deriba B2 MyLisin, Friday madahka program nya deka diatur di Saratok kena 27 nyentuk 28 Julai sereta nyaran 3,000 iku penyereta.
Barang sapa ke deka nyereta program tu ulih ngambi pom ba Opis Palan Servis ADUN Krian enggau Kalaka, Opis Pelajar Pelilih Saratok sereta Institut Deriba Ing Motor di Sarikei berengkah 18 April.
“Program tu nyaran ngagai nembiak ke beumur 16 taun ke atas nyadi tu siti peluang ke chukup manah ungkup nembiak ke bedau ngembuan lisin deriba motosikal B2,” ku iya.
Berebak enggau nya, iya madah program nya siti inisiatif Opis Servis ADUN Krian enggau Kalaka sereta kerejasama enggau Opis Perengka Pengangkut Darat (JPJ) pampang Sarikei dikena ngemuntangka mensia mayuh bulih lisin motosikal B2.-TVS
