KUCHING, 19 April: Perintah endang naka ulih mantu rayat ke dituntung penusah enda disadang, ku Datuk Seri Nancy Shukri.
Menteri Pemansang Indu, Ruang Bilik enggau Komuniti nya madah, Opis Menteri Pengintu Pengelantang Raban Bansa ambika banding, bisi nyendiaka bantu khas ungkup ruang bilik tudah ke ditagup baya tauka kena serang jelu mangah nya.
“Sechara enda rasmi, opis kami endang bisi nyendiaka tulung ngagai ruang bilik tudah baka utai diempa enggau diirup, enggau nyema tudah kena tagup baya tauka enda.
“Tang nyema tudah nya kena serang jelu, endang agi bisi bantu khas deka diberi ngagai sida sebilik,” ku iya lebuh ditanya senentang bantu ke deka diberi ngagai sida ke dituntung penusah.
Nancy ke mega Kaban Parlimen Santubong madah, ungkup operasi SAR ke benung chakah dipejalaika nyengkaum neresa sungai mit ke nyadi sarang baya.
“Operasyen SAR ke dipejalaika sehari tu iya nya raban ejensi ke bekaul baka APM, Bomba enggau PDRM deka neresa sungai mit ke udah surut tang sida enda diasuh lama sampai ai pasang,” ku iya.
Berindik ari nya, iya nangkan mensia mayuh ke diau besemak terus bejimat nangika penatai baya.
Kena Hari Tiga tu tadi, siku orang tuai diripotka lenyau sereta dipelaba kena tagup baya ba Sungai Rayu, Lundu.
Pengari Palan Operasyen, Opis Bomba enggau Penyah Penusah Malaysia (JBPM) Sarawak madah, raban sida nerima kangau pasal penusah nya urung pukul 1.55 lemai.
Ku iya, raban ari Balai Bomba enggau Penyah Penusah (BBP) Petra Jaya udah digerah ngesah palan penusah sereta bejalaika pengawa SAR. -TVS
