KUCHING, 16 April: Perintah Sarawak deka negapka kaul enggau Singapore ungkup penguntung rayat ba kededua menua tu.
Premier Sarawak Datuk Patinggi Tan Sri Abang Johari Tun Openg madahka, kelimpah kerejasama ekonomi, Sarawak mega deka belajar pasal chara mantu raban B40 ti dipejalaika ba menua Singapore.
Abang Johari madahka, aum pasal pekara nya udah dibantaika dalam pengawa betemu sebedau tu enggau Menteri Besai Singapore ke baru iya nya Lawrence Wong.
“Baka ke udah ditemu kita, kitai udah bekereja rat enggau Singapore sereta kami udah betemu enggau Lawrence sereta iya dipeda ngembuan penemu ti chukup manah pasal kerejasama, lalu pemereti entara Singapore enggau Malaysia, tebal agi Singapore – Sarawak.
“Aku tentu semina ubah ti lanchar ungkup Sarawak laban perintah meruan sama, semina tuai aja betukar,”ku iya.
Abang Johari mansutka penemu nya maya dirandau media pengudah ngulu Pengerami Rumah Tebuka Hari Raya Aidilfitri ba rumah Penyanding Penemu Opis Menteri Dagang Antarabansa, Industri enggau Pemeranak Puku, Dato Sri Naroden Majais sehari tu tadi.
Ku tandu iya, kerejasama nya ngaul sektor kuasa enggau dagang baka Opis Dagang enggau Dagang Temuai Sarawak – Singapore (STATOS).
“Enggau iya udah madahka ngagai aku dalam aum kami baka ni sida (Perintah Singapore) mantu raban B40. Aku mikir sida (Singapore) ngembuan chara ti manah.
“Nyadi, aku mikir maya kita bejaku senentang bantu ti disaran, Singapore ngembuan model ti manah,” ku iya.
Lawrence Wong disadang deka berengkah bejalaika tangkup pengawa rasmi nyadi Menteri Besai Singapore keempat kena 15 Mei tu ila.-TVS
