BETONG, 12 April: Penyerakup entara pupu bansa terus nyadi sanding penemu komuniti di Sarawak dalam ngetanka penyerakup.
Taja pan bisi sekeda isu nyadi bedau lama tu tadi ti ngaul sentimen sensitif, tang pekara nya dipeda nadai meri empas ngagai pengerami Hari Raya Aidilfitri ti disambut richah di sarawak, baka di Betong.
Sapit Menteri Nembiak, Lumba enggau Main sereta Pemansang Orang Dagang Sarawak, Dato Gerald Rentap Jabu madahka pekara nya nyata mandangka senentang rayat di nengeri tu enda mudah teparuk enggau isu tauka orang ti nguji deka nempa penyarut ngambika ulih ngeruga penyerakup ke udah lama dikemeran ba menua tu.
“Komuniti kitai di Betong tu endang udah nempa siti penyerakup enggau kaul rat, pia mega ‘ukhuwah’ kitai ti enda ngira bansa enggau maya.
“Nyadi peranak Betong endang suah ngabang sereta mega maya napi penusah.
“Kami sama mantu enggau mega maya ngabang baka tu tauka Gawai, semua datai (ngabang) ke rumah.
“Taja pan kitai meda endur bukai mayuh napi isu ti enda patut nyadi, isu nya ti dikeenggaika kitai, lalu siti ari nya iya nya ngemeranka ulah maya kitai bisi pengerami,” ku iya.
Rentap mansutka pekara maya dirandau raban media lebuh meri timbal senentang Pengerichah Pengerami Hari Raya Aidilfitri di Betong, kemari.
Ku tandu Rentap, rayat di nengeri tu bela sama ngabang ngagai pangan diri maya Hari Raya.
Nangkan ke nya, ku iya enti ulih komuniti ditu patut duduk betungga mua (nyema bisi isu) mutarka penanggul (lengkas) sebedau pekara nya ngerekai nyadi isu bechiping tauka kepapas ngagai pangan diri.
Sama bisi nyempulang pejalai Rentap ngabang Hari Raya Aidilfitri di Betong iya nya bini iya Datin Rosemarie Wong enggau Parlimen Betong Dr Richard Rapu.-Foto:TVS
