KUCHING, 10 April: Aspek penyerakup mesti terus ditegapka rayat pupu bansa enggau pengarap di nengeri tu ngambika pekara ti tau nyadi penyerekang antara rayat ulih ditagang.
Premier Sarawak Datuk Patinggi Tan Sri Abang Johari Tun Openg nyemetak madahka, semua rayat enda milih renggat bela ngesan tanggungpengawa negutka penyerakup ungkup pemaik enggau pemansang nengeri sereta menua.
“Aram mih semua kitai besaup ngetanka penyerakup ti ngaul pupu bansa awakka pekara ti meri empas ke enda manah ulih diteju enggau diseliahka,” ku iya madah.
Iya mansutka jaku nya rambau meri pesan khas Hari Raya Aidilfitri ti dipancharka terus nengah TVS malam Hari Dua tu tadi.
Beduduk enggau nya, Abang Johari madahka rayat pupu bansa di Sarawak sigi begulai sama ngintu sesebengkah pengerami enggau pangan diri.
“Enda ngira sekalika pengerami Hari Raya, Taun Baru China, Gawai Dayak, Krismas enggau Deepavali ulah nemuai tauka ngabang suah diatur.
“Nya alai, aram mih kitai semua besampi ngambika pemaik enggau pengelantang ti udah ditempa kenyau ari suba ba Tanah Kenyalang tu terus nyadi pugu pengering Sarawak nyadi wilayah ti lantang sereta likun,” terang iya.
Kelimpah ari nya, iya nangkan rayat di Sarawak anang mudah nunda ulah komuniti luar ke enda menuku baka rindu betalatka bida ti ngaul elemen penyerakup bekaul enggau isu pengarap enggau peturun nyauka ninting hari.-TVS
