KUCHING, 1 April: Pekit Pengelandik Jari deka diatur nyerumba Simposium Jaku Iban enggau Pengelandik Jari Tikas Sarawak 2024 kena 2 enggau 3 Ogos tu.
Sapit Menteri Pengerai Mensia Mayuh, Pengawa Berumah enggau Perintah Lokal Datuk Dr Penguang Manggil madahka, pom rejister enggau pekit pengelandik jari tu tau dianjung sebedau 15 Mei ila.
Bisi lima kategori dipekitka iya nya nusuk tango tauka marik empang, nganyam tikai bebuah, nenun kain karap, ngukir terabai enggau sugu tinggi ti tebuka ngagai semua rayat Malaysia enda ngira bansa, penatai, umur enggau penempa.
Datuk Dr Penguang Manggil ke mega Kaban Kunsil Nengeri (ADUN) Marudi madahka, adat, seni enggau main asal Iban entara tiga elemen ke mesti ditan dalam nentuka pekara nya terus relevan senutuk enggau rambai jaku ‘Ngemeranka Jaku Iban enggau Pengelandik Jari’.
“ Ungkup penyereta (pekit) simposium tu tadi iya nya RM30, tebuka ngagai semua peranak di serata Sarawak ungkup rintai ke udah disebut aku tadi.
“Taun nyin kemari kitai ngaga Simposium Ngepan Iban, dalam jaku bukai reti nya pekayan lalu serak tu Jaku Iban enggau Pengelandik Jari baka anyam, sugu tinggi, ngaga tango, kain karap enggau ngukir terabai,” ku iya rambau aum pemberita Simposium Jaku Iban enggau Pengelandik Jari Tikas Nengeri Sarawak 2024.
Tandu iya, video benung ngaga asil pengelandik jari mesti dianjung sebedau 15 Jun lalu asil pengelandik jari ti dipekitka anjung sebedau 15 Julai enggau pemutus sereta perais deka disua kena 3 Ogos ila.
Kelimpah ari nya, champion dalam pekit tu deka mai pulai perais mata duit RM2500 besereta trofi enggau setipikit, lumur dua RM2000 besereta trofi enggau setipikit lalu lumur tiga RM1000 besereta trofi enggau setipikit lalu pemenang perais pengaga ati deka nerima RM300.
Penerang ke silik pasal pekit tu tau betanya ngagai komiti pekit pengelandik jari tauka ngelawa laman facebook Datuk Dr Penguang Manggil.- TVS
