KUCHING, 1 April: Akademi Serakup Dayak Iban Sarawak (ASADIA) terus chakah ngangkat sereta ngerembaika main asal Iban ukai semina ba mengeri tang mega ngagai menua pesisir.
Tuai ASADIA Mabong Unggang madah serak tu ASADIA bisi ngatur Kelas Ngajat ungkup indu enggau lelaki ba Rumah Panjai Guang Latip di Raeh Baru Serian urung 37 batu ari Kuching.
Bisi 22 iku indu nyereta Kelas Ngajat diajar Elsie Joanes enggau Caroline anak Dewort.
Nangkan ke nya, Kelas Ngajat Lelaki dipasuk 10 iku nembiak diajar Henry Guya.
Ku terang Mabong semua sida ke belajar ke main asal tu bala nembiak sereta nyadi raban ke dikeandal terus ngetanka pesaka asal Iban nyentuk ke jemah ila.
“Chukup gaga amat ati meda sida ti biak- biak ngembuan pengerindu ke main asal diri empu.
“Taja pia pengerindu sida iya semina ulih tebantai enti bisi orang ngulu sereta ngatur kelas main asal, ukai semina ngajat tang main asal ke bukai,” ku iya madah ngagai TVS nengah sebengkah penerang, empai lama.
Berebak enggau nya, Mabong madah Kelas Ngajat nya diatur nengah kerejasama nembiak Tuai Rumah Guang serumah enggau ASADIA.
“Nya alai, arapka mayuh agi raban Tuai Rumah ngembuan penyiru ati ngagai main asal kitai sereta ransing ati besaup ngatur kelas main asal ungkup nembiak redak sida,” ku iya.
Pia mega ku Mabong nampung jaku Tuai Rumah Guang; enti kitai ke besai tuai tu enda ngatur pengawa ngetan ke main asal kitai, sida ke biak sigi enda nemu ngatur diri empu lalu nya ngujungka main asal Iban deka lelang midang laban nadai orang ngulu ke nembiak rebak baru nyerungkai penemu sereta belajarka pengelandik ba main asal, ku iya.-TVS
