SPAOH, 26 Mac: Rumah Panjai Mendit Unsu di Penom nyadi rumah panjai keterubah di Betong ngembuan Palan Pengerembai Berita Nasional (NADI).
Sapit Premier Sarawak Datuk Amar Douglas Uggah Embas madah, enti udah dibuka ila palan nya deka ngemuntangka pengani ba rumah panjai nya ngelakuka produk dagang sida ngagai orang luar.
“Tu kebendar sigi program dibaruh MCMC (Komiti Multimedia enggau Komunikasyen Malaysia) nyadi sida udah milih Rumah Panjai Mendit di Penom siti ari Palan Pengerembai Berita Nasional (NADI).
“Palan tu deka disikap enggau perengkaguna internet lalu iya deka ngemuntangka sida berandau enggau komuniti luar.
“Nyadi ari nya mega sida deka muntang ngelakuka agi produk dagang ngagai mensia mayuh kelimpah ari pemisi nengah jalai raya ke udah menyana,” ku iya.
Uggah madah munyi nya rambau pejalai ngabas empat buah rumah panjai di sitak DUN Bukit Saban, empai lama.
Sama bisi nyereta pejalai tu bini Uggah, Datin Amar Doreen Mayang, Kaban Parlimen Betong Dr Richard Rapu enggau ke bukai.
Berebak enggau nya, Uggah ngarapka raban nembiak di pelilih menua nya anang enda nguji ngerebut peluang bekaul ari pemisi palan NADI dikena belajar sereta ngerembaika aktiviti dagang nengah tali arus (online).-TVS