SIKU anak ti pemalu tang taja pia karakter iya berubah enti bepekit tauka ngerindang ba atas panggau.
Edina Lanying, asal ari menua Kuching madahka iya berasai temegah ati meda anak iya Dion Das 8 taun bepekit lalu ngujungka iya bulih Chempian ba Grand Final Malaysian Championship of Performing Arts 2024 ke diatur di Kuala Lumpur empai lama.
“Maya nya endang aku enda nyangka asaika ukai anak aku laban maya iya belatih ngajat bunga ajat iya enda sama baka iya bepekit. Dion endang ngembuan pengelandik nengkebang ajat.
“Niang aki kami kelia endang orang ke landik ba senentang adat enggau main asal Iban. Engka nya dipurihka Dion,” ku iya.
Nangkan ke nya, apai Dion Louis Lansam madahka anak iya berengkah ngajat maya ba sekula Smart Reader Kids lalu keterubah iya ngajat ba Pekit Keling enggau Kumang Gawai Dayak ke diatur ba sebengkah endur di Kuching lalu ari nya iya majak rinduka pengawa tu.
Louis mega bekunsika senentang orang ke deka nyadi tulang belakang dalam penyulut Dion ba pekit tu iya nya sebuah raban tebilang ke udah nempa nama ba renggat antarabansa iya nya raban At Adau.
“Muzik ti dikena Dion bepekit sereta ngerindang naka ke diatu iya nya muzik ari raban At Adau, Menjong. Ba pekit ke diatur ba Long Beach California ila raban At Adau madahka sida deka nyendiaka siti lagu khas ungkup Dion.
“Dion mega dibantu siku penganta iya nya Gary Lauder ngambika pekayan iya ke baka Burung Ruai nya tampak agi dipeda,” ku iya.
Kelimpah ari nya apai iya mega madahka ajat ke dibai anak iya ngembuan kreativiti ke alai ajat iya pengaruh ari dua iku burung Borneo iya nya Burung Ruai enggau burung Kenyalang.
Naka ke diatu Dion suah dikangau ngerindang tetiap ujung minggu lalu tu mih maya iya belatih tang taja pia ba hari biasa Dion meri fokus ngagai pelajar iya.
Dion Das, 8 taun deka ngarika menua Malaysia ngagai World Championship of Performing Arts (WCOPA) 2024 di Amerika Syarikat ke deka diatur kena 28 June nyentuk 6 Julai tu.
Datuk Amar Douglas Uggah tekait ati meda pengelandik ‘The Little Borneo Birdie’
Pemujur Dion Das, 8 taun bulih Chempian ba Grand Final Malaysian Championship of Performing Arts 2024 ke diatur di Kuala Lumpur empai lama ngujungka iya ngarika menua Malaysia lebih agi Sarawak matak pengerindu Sapit Premier Sarawak Datuk Amar Douglas Uggah Embas.
Uggah meransang Dion ngambika terus bebendar sereta ngiri penemu diri enggau ngatur latih ngajat dikena nyikap diri bepekit ba panggau antarabansa.
“Kitai chukup gaga anak tauka uchu kitai bisi peluang ngayanka pengelandik diri ba menua jauh ngarika bansa, ngarika main asal kitai lalu iya tu udah ngasuh kitai di menua Sarawak berasai temegah ke alai iya patut ditulung sereta disukung.
“Aku madah ngagai iya kemari anang enda bebendar laban nya ukai semina ngarika diri empu, tang ngarika bansa enggau menua kitai ukai semina di Sarawak tang mega ngarika menua Malaysia. Nya alai kami chukup besai pengarap awakka nuan datai din ila mujur mansang maju lalu ulih menang ba pengawa nuan ba din,” ku iya.
Nangkan ke nya, enggau gaga ati Uggah ke mega Menteri Infrastruktur enggau Pemansang Penyangkai Kapal Sarawak meri bantu mata duit penyampau RM30,000 ba baruh ungkup Opis Sapit Premier Sarawak dikena mantu ngemuntangka semua pengawa sereta pejalai Dion ke deka bepekit ba Long Beach, California di Amerika Syarikat kena 28 June nyentuk 6 Julai tu ila.
Dion Das nerima turu ari Opis Menteri Dagang Temuai, Industri Kreatif enggau Seni Pemerindang
Asil pengelandik Dion tauka tebilang enggau nama The Little Borneon Birdie ngujungka iya bulih turu ari Opis Menteri Dagang Temuai, Industri Kreatif enggau Seni Pemerindang.
Sapit Menteri Dagang Temuai, Industri Kreatif enggau Seni Pemerindang Datuk Snowdan Lawan ngarika opis menteri iya nyukung penuh pengawa Dion ke deka bepekit ba World Championship of Performing Arts (WCOPA) 2024 di Amerika Syarikat tu ila.
“Kami endang nyukung penuh pengawa Dion ke deka bepekit ngarika menua kitai ngayanka pemanah sekalika penyelai identiti bansa kitai ba mata dunya.
“Dion tu beumur 8 taun lalu chukup biak udah ngembuan peluang mai nama Malaysia lebih agi Sarawak bepekit ba panggau antarabansa. Tu siti peransang ngagai nembiak rebak baru lebih agi bansa Dayak ngambika terus angkunka adat enggau main asal kitai Iban,” ku iya.
Dion Das bulih turu Mudahcara Warisan, Kesenian Dan Kebudayaan ba baruh Opis Menteri Dagang Temuai, Industri Kreatif enggau Seni Pemerindang penyampau RM58,000 dikena ngulu pekit ke diatur tu ila.
Snowdan mega ngarapka Dion terus belatih sereta nyikap diri ngambika ulih nyulut ba panggau dunya. – TVS
