BETONG, 15 Mac: Penatai raban nembiak ti bisi ngambi bagi bedagang ba Bazar Ramadan Betong mandangka raban nya bisi pengeransing dalam ngerebut peluang dikena nambahka penatai pemisi.
Sapit Menteri Nembiak, Lumba enggau Pemansang Dagang Sarawak Dato Gerald Rentap Jabu madah, pemansang nya chukup positif lalu berebak enggau nya iya deka nyadi peransang ngagai iya empu meri sukung ngagai pemansang nembiak ba nengeri tu dudi hari.
“Kitai meda mayuh bala sida ke datai kitu ukai semina ari Betong aja tang bisi ari pelilih menua bukai.
“Pia mega kitai meda mayuh pedagang ke bisi ngambi bagi nya datai ari sida ke nembiak lalu nya meri peransang ngagai aku ngambi terus meri sukung ngagai sida mekuhka pengawa dagang,” ku iya.
Rentap ke mega Kaban Kunsil Nengeri (ADUN) Layar madah munyi nya pengudah ngabas Bazar Ramadan Betong, kemari.
Nangkan ke nya, Rentap bisi ngelalau semua raban ke bisi bejual ba bazar ramadan nya mesti ngemeratka pemeresi dikena nyeliahka sebarang pekara ke enda disadang.
“Aku minta kerejasama ari semua ukai semina ari bala ke bedagang tang mega raban perintah lokal patut nentuka taba tu meruan likun enggau beresi.
“Kitai enggai ninga enti bisi nenama tentu sida ari opis pengerai ulih neritka atur ngasuh tutup nyema bisi kompelin.
“Nyadi kitai enggau utai baka nya nyadi lalu guna peluang tu enggau manah,” ku iya.
Bisi 58 ruai alai bedagang bisi disediaka ngagai bala pedagang ba Bazar Ramadan Betong diatur Opis Pengintu Pengelantang Pedagang Melayu Betong taun tu.
Berebak enggau nya setengan ari penyampau sida ke bedagang nya datai ari bala nembiak ari dalam enggau luar Betong.-TVS
