SRI AMAN, 15 Mac: Projek Jalai Tebing Tasik ngagai Jematan Batang Lupar II ke nyadi jalai alternatif ngambika enda nengah jalai di kandang endur mengeri dikearap ulih tembu sereta enggau jematan nya, ku Datuk Amar Douglas Uggah Embas.
Sapit Premier Sarawak nya madah, pengawa ngaga jalai alternatif ti beungkus RM154 juta nya ngaul perambu projek ari Jalai Kejatau ngagai kandang endur jematan nyengkaum perambu ngaga jalai alternatif ngagai pasar Simanggang.
Nangkan ke nya, Uggah madahka deka kededua projek nya patut tembu sereta dikena nyeliahka sebarang penanggul jalai alun ba kandang endur ke besemak.
“Projek tu ari jalai nya tadi ngagai Jematan Batang Lupar ngambika jalai ari jematan nya enda nengah jalai pasar jalai chit deka ngagai kandang endur nya enggau kus bejalaika projek tu iya nya RM154 juta.
“Aku minta ngagai JKR ngambika ngatur projek tu ngambika jematan tu tembu jalai pen tembu enti enda pekara tu ulih meri penanggul ngagai jalai ba kandang endur tu,” ku iya.
Iya bejaku munyi nya ba aum media sepengudah pengerami ‘Sambutan Jam Kerja Selamat Tanpa Kecederaan Masa Hilang’ (LTI) ba sebuah hotel tebilang ditu, pagi tadi.
Uggah mega madahka mayuh agi projek ngaga jalai ke benung diatur ti ngaul kandang endur Sri Aman ti dipelin Ejensi Pemansang Sri Aman (SADA).
Ku iya madah Opis Kereja Raya (JKR) Sarawak nyadi komiti pengatur deka chakah nentuka tetiap projek ti dipejalaika deka nyapai kualiti ti dikedeka sereta tembu nitihka timpuh.
Ke penerang entara projek ngaga jalai alun ke benung dipelajaika diatu ngaul kandang endur di Sri Aman iya nya baka Pakej B1 iya nya perambu ngaga jalai besai ari Sebuyau ngagai Lingga, Samarahan enggau Sri Aman. – TVS