BETONG, 14 Mac: Pengerami Gawai Dayak Renggat Betong ke deka diatur kena 18 tu ila deka ngangkatka agi semangat penyerakup pupu bansa di Sarawak lebih agi di bagi menua Betong.
Penyanding Penemu Kaban Komiti Besai Pengerami Gawai Dayak Renggat Betong 2024, Dato Gerald Rentap Jabu madahpengerami nya ila deka meri empas positif ngagai industri dagang temuai di nengeri tu.
“Tu deka mandangka adat kitai kelimpah ari sukut penyerakup iya deka meri empas positif ukai semina ngagai rayat di menua Betong tang mega ngagai temuai ke datai ari luar.
“Sida deka meda pemanah adat rayat di Betong iya nya bansa Iban, Melayu, China sereta ke bukai sama ulih duduk semija sereta bekenaka ngepan asal diri.
“Tu nyata mandangka budaya sereta penyerakup kitai ulih begulai taja bebida bansa,” ku iya.
Rentap ke mega Sapit Menteri Nembiak, Lumba enggau Pemansang Dagang Sarawak madah munyi nya pengudah tembu Aum Komiti Besai Pengerami Gawai Dayak Renggat Betong 2024 diatur ba Opis Residen Betong, empai lama.
Ku tandu Rentap mayuh program udah ditusun deka diatur berengkah bulan Mei nyentuk bulan June beserimbai enggau Gawai Dayak 2024.-TVS
