SARATOK, 13 Mac: Krian Fest Nature Challenge (KFNC) 2024 dipelaba ulih matak urung 5,000 temuai ari dalam enggau luar Saratok.
Kaban Kunsil Nengeri (ADUN) Krian Friday Belik madah, iya andal penyampau nya ulih dijapai bepelasarka pemujur ke udah dijapai maya baka keterubah program nya diatur ba Ulu Krian sebedau tu.
“Kitai melabaka penatai orang ke masuk program serak tu ila deka mayuh ba pekit rakit.
“Penyampau ke disaran kitai dalam 100 buah rakit.
“Pia mega enggau pekit ngena ensikal kitai deka nguji matak mayuh orang ngambi bagi datai ari luar Sarawak baka sebedau tu.
“Nya alai, temuai ke disadang datai maya tu ila dipelabaka urung dua ke lima ribu sekumbang program nya diatur,” ku iya.
Friday madah munyi nya maya dirandau media pengudah tembu Aum Kedua Pengatur Krian Fest Nature Challenge 2024 ba Opis Pelilih Sarawak, empai lama.
KFNC 2024 deka diatur pengelama dua hari berengkah 29 nyentuk 30 June tu ila.
Antara program besai diatur nyerumba KFNC 2024 iya nya ‘Krian Rafting Challenge’ enggau ‘Krian Mountain Bike Eco Jamboree’ sereta ‘Saberkas Nature Run’.-TVS