SARATOK, 10 Mac: Bisi empat projek beungkus RM12 juta dibarub Komiti Sektor Betanam Betupi ba sitak Kunsil Nengeri (DUN) Saribas deka ditinda abis laun bulan April tu.
Kaban Kunsil Nengeri (ADUN) Saribas Datuk Mohd Razi Sitam madah projek nya dibaruh kemata Opis Parit enggau Entali Ai (JPS) sereta nyaran ngagai pengawa ngemanah jalai kebun.
“Sitak aku (DUN Saribas) bisi empat projek lebih agi bekaul ngemanah jalai kebun.
“Diatu pengawa benung dikemata raban JPS iya nya matau pekara bekaul kelimpah betemu enggau tuai komuniti enggau tai rumah pasal tanah ti bisi kena teresa.
“Semua projek tu deka ditinda pun bulan April lalu aku ngarap semua nya mujur,” ku iya.
Razi madah munyi nya pengudah tembu sebengkah aum ke diatur di Kuching, apin lama ke udah.
Ku terang Razi projek nya mega dikena nangkup saran ari Chairman Ejensi Pemansang Bagi Menua Betong (BDDA) Datuk Amar Douglas Uggah Embas ti deka inta Betong dikemansang nyadi siti palan pemansang betanam betupi enggau Tibang Pemakai di Sarawak.
Kelimpah ari projek infrastruktur, program bantu input betanam betupi mega bisi disuaka ba DUN Saribas dikena mantu raban pekebun mit kelapa sawit ngambika sida ulih ngemansangka utai tanam nya enggau manah.-TVS
