SERIAN, 25 Feb: Raban pengempu Tanah Adat Bansa Asal (NCR) di nengeri tu dipinta meri kerejasama penuh ngagai Opis Tanah enggau Survei (JTS).
Sapit Premier Sarawak Datuk Amar Douglas Uggah Embas madah tu dikena nentuka proses nyukat kelinggi tanah NCR ke dipenggi sida bejalai enggau lanchar.
“Kesatu kitai mesti minta ngagai Opis Tanah enggau Survei, ulih enda kitai nguna kandang endur ke deka disukat kitai nya ngena chara DBNA.
“Enti siku nadai datai Opis Tanah enggau Survei tentu nadai ulih ngaga nama-nama mih?
“Enggaika belaya, dia aku udah berandau enggau Morris Superintendan sereta direktor minta nguji dulu ungkup sitak Iban.
“Nyadi pengawa nya mujur, semua sitak aku (Bukit Saban) diatu disukat nitih chara tu (BDNA), terima kasih Opis Tanah enggau Survei,”ku iya.
Uggah madah munyi nya maya bejaku ba Pengerami Serumpu Makai Lemai diatur ba Diwan Masyarakat Serian, malam tadi.
Ku terang iya, naka tu bisi 2.76 juta ekar tanah NCR di selampur nengeri lalu ari penyampau nya urung 2.1 ekar udah digazet nyadi Rizab Komunal Bumiputera (Betanam Betupi) dibaruh Seksyen 6.
Udah nya, urung 25, 000 ekar udah mujur disukat ngena Seksyen 18 enggau diberi surat pala tanah.-TVS
