BETONG, 24 Feb: Kaunsil Lada Malaysia (MPB) ti nguna teknologi baru dalam mantu negapka industri lada di Sarawak sigi disambut manah.
Sapit Premier Sarawak Datuk Amar Douglas Uggah Embas madahka, pemisi teknologi baru baka ‘Internet of Thing’ (IoT), ulih nyungkak asil sereta ngangkatka kualiti lada di Sarawak dudi hari.
“Aku chukup rindu lebuh ninga Tuai Direktor Kaunsil Lada bisi madah ngagai kitai semua pasal sida deka nguna teknologi baru nyengkaum IoT ti betuju dikena nambahka pengeluar lada.
“Baka ke disebut aku tadi diatu ba taka pukul rata siti pun lada ulih ngeluarka dua kilo lada burak.
“Nya alai, teknologi baru enggau chara baru sereta sum baru deka nambah ari dua kilo ba siti pun ulih nyadi empat kilo,” ku iya.
Iya mansutka jaku nya rambau dirandau pemberita pengudah bejadika Program Randau Pemansang Industri Lada ba Rumah Panjai Joseph Sanda, Jambu Kerampak di Layar ditu kemari.
Uggah nerangka, teknologi baru nya mega bisi daya nambahka asil penatai pemisi pekebun lada dudi hari sereta nyungkak pemansang industri lada di bagi menua Betong enggau di selampur Sarawak.
Dulu ari nya, iya bisi nyerahka geran ari MPB ke nguna kos penyampau RM1.737 juta ngagai 250 iku pekebun enggau pengeluar lada dalam bemacham kategori ke ngaul 11 buah rumah panjai di Betong.-TVS