MIRI, 24 Feb: Perayat Miri dilalau semampai nyaga pemeresi kandang genturung pendiau diri berindik ari penambah kes rikod tabin denggi di pelilih nya.
Kaban Kunsil Nengeri (ADUN) Senadin, Dato Sri Lee Kim Shin madahka, raban perintah lokal enggau komuniti mesti besaup nentuka kandang endur ngelingi sida baka genturung pendiau enggau premis dagang seruran beresi.
”Naka diatu, di Miri bisi 50 kes tabin denggi enggau kitai semua mesti mutarka penanggul tu enggau jampat.
“Kitai enggaika penyakit tabin denggi tu majak nambah. Kitai mesti nagang pekara tu,” ku iya.
Iya mansutka jaku nya rambau Operasyen Begulai Nagang Enggau Nyeliah Igi Penyakit Denggi Pelilih Miri di Taman Ceria, pagi tadi.
Iya nerangka, ’Op Cegah Denggi’ udah dipejalaika ba Taman Ceria berindik ari 13 kes tabin denggi dirikodka di kandang endur nya.
Lee mega udah minta raban ari opis perintah lokal sereta pegawai pengerai seruran beratka pekara nya sereta deka terus bejalaika pengawa matau dikena nagang pengerekai kes tabin denggi nya.-TVS
