ASAJAYA, 23 Feb: Sarawak deka berunding enggau perintah besai pasal nambahka penyampau mesin mamogram dikena ngubat pesakit ke bisi ditepan riman tusu di nengeri tu.
Sapit Premier Sarawak, Datuk Amar Dr Sim Kui Hian madahka Sarawak diatu semina ngembuan empat buah mesin ungkup ke guna pesakit riman tusu.
Nya alai, raban sida deka berunding enggau perintah besai sereta bekerejasama enggau raban Petronas nengah Tanggungpengawa Rama Korporat (CSR).
“Ba selampur Sarawak, sakit riman tusu iya nya sakit riman ke pemadu tinggi, ba sepital perintah semina ngembuan 4 buah mesin mamogram.
“Empat buah mesin tang siti ari tu udah jai.
“Kita nemu tu ukai servis ke manah lalu udah nya, kitai deka berunding enggau perintah besai,” ku iya.
Iya bejaku munyi nya ba pengerami nyuaka barang ke guna ninting hari kereban perubat pemun ba Klinik Pengerai Sadong Jaya ditu pagi tadi.
Sebedau tu SABATI (Serakup Bala Bini Menteri enggau Sapit Menteri Sarawak) udah meri bantu mesin ultrabunyi penyampau RM100,000 ti diengkahka ba Unit Sakit Riman Tusu ba Sepital Besai Kuching (HUS).
Mesin ultrabunyi ke ditempa Amerika Serikat nya pemadu baru sereta chukup beguna dikena ngulihka penerang ke engkeman pesakit lalu ulih ngelengkas proses diagnosis.-TVS
