BETONG, 23 Feb: Agih sepenyampau RM3 juta udah diungkupka ngagai raban pekebun lada di sitak Kunsil Nengeri (DUN) Bukit Saban.
Sapit Premier Sarawak Datuk Amar Douglas Uggah Embas madahka, ungkup ba baruh Ejensi Pemansang Bagi Menua Betong (BDDA) nya dikena nambahka inisiatif ke udah bisi ari Perintah Besai nengah Kaunsil Lada Malaysia (LLM) sereta Opis Betanam Betupi.
“Nya alai kami udah ngaga pemutus ngambika sitak Bukit Saban diungkupka RM3 juta ti nyadi iniasiatif tambah laban udah bisi bantu ari Kaunsil Lada Malaysia enggau Opis Betanam Betupi.
“Nya kebuah kami deka nambah awakka lebih tegap sereta meri penguntung ngagai pekebun lada di sitak Bukit Saban,” ku iya.
Iya mansutka jaku nya rambau dirandau pemberita pengudah bejadika Program Randau Pemansang Industri Lada ba Rumah Panjai Joseph Sanda, Jambu Kerampak di Layar ditu pagi tadi.
Uggah nerangka, inisiatif nya mega nyadi peransang ngagai bala pekebun lada ngambika sida lebih bekenanas nambahk produktiviti udah tu.
Dalam program nya mega, iya ke mega Kaban Kunsil Nengeri Bukit Saban meransang raban nembiak anang enggai ngaul diri sechara aktif dalam industri lada jemah.
Sama bisi ngulu program tu Menteri Industri Pemakai, Komoditi enggau Pemansang Wilayah Sarawak, Dato Sri Stephen Rundi Utom, Kaban Parlimen Betong, Dr Richard Rapu enggau ke bukai.-TVS
