SIBU, 23 Feb: Universiti Teknologi Sarawak (UTS) udah bejadika siti program akademik baru iya nya Bachelor Degree Sains Pengelikun enggau Pengerai Orang Gawa (Kepujian) kena Hari Tiga.
Bekau ari penambah program akademik baru nya, ngujungka UTS diatu bisi 35 program akademik berejister dibaruh MQA (Ejensi Pengaku Malaysia) enggau Ejensi Professional.
Ku Sapit Mandal Chanselor (Akademik) UTS, Professor Ir. Ts. Dr Mohd. Shahril Osman raban sida udah nerima bemacham timbal ari industri kunteriktor sereta minyak enggau gas iya nya program akademik nya ngembuan peluang gawa ke chukup besai.
“Sida tu chukup begunaka supervisor pengelikun taba, pemeresa pengelikun enggau pemegai kad gadung (CIDB).
“Ari nya mih kitai ngasaika program tu chukup nemban lebih agi ungkup rayat Sarawak.
“Peluang tu setipak ebggau sida ke biak ngambika sida bisi peluang gawa.
“Kitai ngaga siti program, kus nya patut bisi pengawa,” ku iya.
Iya madah munyi nya maya dirandau pemberita bekaul enggau pengelaku graduet dibawah program nya pengudah tembu bejadika program nya ba Diwan Chanselor Tun Abdul Taib Mahmud, empai lama.
Ku tandu Shahril bidang nya enda baka bidang bukai ke lebih mayuh pelajar baka bidang Sains tauka Litericha.
Tang iya endang siti bidang ke chukup penuh lalu setipak enggau guna ba semua industri.
“Program tu mega deka ulih nangkup peminta orang gawa lebih agi ba bidang industri di Sarawak.
“Tambah mega nengeri tu diatu balat mansang lebih agi ba bidang minyak enggau gas seriris enggau inisiatif Perintah Sarawak,” ku iya.
Nangkan ke nya, Chairman Kaunsil Direktor UTS, Datuk Dr Annuar Rapaee madah, nengah pemansang ke majak nyadi dalam industri kunteriktor, minyak enggau gas di Sarawak dia program tu chukup nemban dikena nangkup guna orang gawa dalam industri.
Ku iya pemesai guna pengelikun ba endur gawa endang dikemerat lebih agi pemisi projek-projek ke besai baka kilang hidrogen enggau kilang metanol di Bintulu nyadi semua tau bendar ngundang penusah ke enda disadang.
Tandu iya, program nya dikearapka ulih meri pemereti ati ke nyerangkung semua pekara pasal atur ke patut digaga enggau ngiri penemu pasal standard pengelikun ke mesti dititih.-TVS
