SIBU, 22 Feb: Lalau ke diberi niang kedu Tuai Pemegai Menua (TYT) Nengeri Sarawak Tun Pehin Sri Abdul Taib Mahmud ti ngemeratka bala ketuai di Sarawak patut nyadi tuai ngagai semua komuniti endang lalau ke chukup besai reti ngagai Datuk Dr Annuar Rapaee.
Kenu ku Sapit Menteri Pelajar, Inovasi Enggau Pemansang Bakat nya lalau ari niang Tun Taib dikenatai maya iya begulai enggau niang dalam rantau jalai ngulu sebengkah program ke Sekuau suba.
Ku Dr Annuar jaku lalau nya meruan dikeingat iya taja pan betaun udah nyadi.
“Aku agi ingat, iya chukup ngemeratka kitai (ketuai) di Sarawak patut bekerejasama, baik nya China, Melayu, Bidayuh, Iban, Orang Ulu.
“Nadai chara bukai ungkup kitai ba Sarawak (deka maju).
“Tu mih lalau iya. Iya nyemetak madahka nyadi tuai di Sarawak endang ungkup semua bansa, ukai ungkup komuniti diri empu aja. Aku chukup bebasaka lalau nya,” ku iya.
Iya madah munyi nya maya aum pemberita di Dewan Canselor Tun Abdul Taib Mahmud pagi kemari.
Tandu anuar mega, iya madah diri antara ketuai ke betuah laban kala gawa dibaruh iring Tun Taib maya agi nyadi Kepala Menteri Sarawak sebedau ke dipadu nyadi TYT Nengeri Sarawak.
Udah nya, lebuh ngelansa senentang diri ke nyadi Chairman Kaunsil Direktor Universiti Teknologi Sarawak, Dr. Annuar ngenataika penyinu ati ngagai sida niang Tun Taib sebilik lalu ngasaika pemidang Tun Taib siti pengerugi besai ngagai Sarawak.
“Tun iya nya Chanselor keterubah UTS lalu ngarika raban UTS kitai chukup sini enggau pemidang Tun tambah mega iya siku tuai ke chukup mayuh bejasa ngagai nengeri Sarawak enggau mega ngagai UTS.
“Iya siku ari pemungkal penumbuh UTS kenyau 10 taun ke udah nyentuk kitai meri nama diwan ke baru tu ngangkatka nama iya Diwan Chanselor Tun Abdul Taib Mahmud.
“Nyadi pemidang Tun endang pengelenyau ke chukup besai ukai semina ngagai selampur nengeri Sarawak tang mega ngagai menua.-TVS