KUCHING, 21 Feb: Pemidang kedu Tuai Pemegai Menua (TYT) nengeri Sarawak Tun Pehin Sri Abdul Taib Mahmud, 87 taun endang diasaika genap iku raban tuai Tanah Kenyalang ke bela sinu nerima berita nya.
Sapit Premier Sarawak Datuk Amar Dr Sim Kui Hian ba siti penerang laman Facebook rasmi iya madahka, Sarawak lenyau siku tukuh ke landik dalam bidang politik.
“Tun Taib tu kaban politik niang apai aku, Tuai Kabinet sereta Chairman Yayasan Jantung Sarawak.
“Pengelama 33 taun megai pangku pengawa nyadi Kepala Menteri Sarawak, iya ukai semina mai penegap politik (kelimpah Ming Court 1987, berengkah kunsi politik ti endang dipechaya niang apai aku) tang mega pengelantang rama enggau pengarap ngaul pupu bansa di Sarawak,” ku iya madah.
Dr Sim ke mega Menteri Pengerai Mensia Mayuh, Pengawa Berumah enggau Perintah Lokal Sarawak nerangka, Tun Taib mega siku tukuh ke betanggungjawap mindahka Servis Tungkul Ati ari Sepital Besai Sarawak (HUS) ngagai Kota Samarahan ke diatu dikelala nyadi Palan Tungkul Ati Sarawak kena 2001.
“Tun Taib Mahmud ngesan tanggungpengawa Nyadi Chairman Yayasan Jantung Sarawak pengudah pemidang Toh Puan Laila Taib kena 2009.
‘Kelimpah ari pemansang politik di Sarawak, legasi Tun Taib iya nya parti politik ti bepelasarka Sarawak ngatur nengeri lalu ukai ngelakka UMNO sereta MCA datai ke Sarawak,” ku iya madah agi.
Dr Sim madahka diri mayuh belajar ari Tun Taib senentang strategi ngatur sesebengkah pekara seraya seruran ingatka pesan Tun ”Jaku orang kapa didinga, peda dulu gaya siku-siku orang nya,” tandu iya.-TVS
