KUCHING, 19 Feb: Atur nyiri Datuk Mutang Tagal nyadi Yang Dipertua Dewan Negara ke mega siku anak bansa Lun Bawang ti keterubah iya mangku pengawa nya mandangka perintah Madani enda bechiping.
Sapit Menteri Digital, Datuk Wilson Ugak Kumbong madahka diri temegah ati sereta andal iya ulih bejalaika tangkup pengawa nya enggau manah berindik ari peneleba ke dalam ba bidang undang-undang.
“Datuk Mutang Tagal kala nyadi Kaban Parlimen pengelama dua penggal berengkah ari 1982 nyentuk 1990, bejalaika pengawa dagang sereta siku luyar Lun Bawang ke bisi peneleba ba bansa orang Lun Bawang di menua Sarawak.
“Tu mandangka perintah Madani sekali tu enda milih bansa, enda milih pengaraplalu nemu tuju kuing iya nya semua rayat sebaka,” ku iya rambau ditelefon pemberita TVS lebuh Hari Satu.
Ku iya, Mutang mega dikelala siku tuai ti bepenau sereta mayuh peneleba dalam ngatur pengawa ti ulih nangkup pengawa nyadi speaker Dewan Negara ke baru serak tu.
Ungkup penerang, kedu Kaban Parlimen Bukit Mas, Datuk Mutang Tagal mujur angkat sumpah mangku pengawa nyadi Yang Dipertua Dewan Negara ke-20 kena Hari Satu.
Opis Yang Dipertua Dewan Negara dalam siti penerang madahka, pengawa nyiri nyadi Kaban Dewan Negara iya nya ungkup timpuh tiga taun berengkah 15 Februari nyentuk 14 Februari 2027.-TVS
