PUSA, 18 Feb: Naka tu, sitak Parlimen Batang Lupar mujur ngerikodka penyampau pemadu mayuh penyereta ngambi bagi ba Program Bantu Lisin Deriba MyLesen (B2) di Sarawak.
Sapit Menteri Pengangkut Malaysia (MOT) Datuk Hasbi Habibollah madah pemujur nya ngemegah laban bisi dipasuk raban bujara nyengkaum nembiak sekula ba sitak nya.
“Batang Lupar tu endang nempa rikod mih iya nya di Sarawak. Naka tu Parlimen tu mih pemadu mayuh iya nya 1017 pemadu mayuh.
“Sitak aku empu (Limbang) semina 944 aja, nyadi tu rikod ke pemadu manah mih.
“Puji Tuhan, aku andal tu asil pengeransing YB Kaban Parlimen kita (Batang Lupar) enggau mega ADUN ba baruh Parlimen tu ngelakuka enggau ngiga penyereta kelimpah inisiatif penyereta nya empu ti deka ngulihka lisin B2 tu,” ku iya.
Ku tandu iya, MOT nyelinting urung 40, 000 iku penyereta ngambi bagi ba program, nya ba selampur menua dalam taun tu.
Iya mansutka penenemu nya maya nangguhka Program Bantu Lisin Deriba MyLesen (B2) ungkup sitak Parlimen Batang Lupar ditu, kemari.
Berebak enggau nya, Kaban Parlimen Batang Lupar Mohd Shafizan Kepli ngelalau raban penyereta ke bulih lisin deriba sida bak dikena bejalaika pengawa dagang tauka aktiviti ke ulih mantu nambahka penatai pemisi diri.
“Aku ngarapka semua kita nguna manah lisin B2 ke diulih kita sehari tu ngambika mantu ngemuntangka pengawa kita ba sitak tu.
“Ari pemisi lisin nya ulih dikearap ulih dikena nyungkak sosio ekonomi enggau produktiviti peranak lokal enggau ngemuntangka pemindah sida,” ku iya.
Sama bisi ngulu pengawa nya Direktor Opis Pengangkut Darat (JPJ) Sarawak Norizan Jili, Sapit Direktor JPJ Sarawak Noraini Mohd Nawi, Sapit Residen Bagi Menua Betong Mahra Salleh enggau ke bukai.-TVS
