KUCHING, 15 Feb: Perintah Sarawak mantaika juluk deka nempa kerejasama enggau menua Serakup Eropah (EU) dalam sektor pemansut kuasa ngambika ulih ngurangka empas ubah klimate.
Premier Sarawak Datuk Patinggi Tan Sri Abang Johari Tun Openg madahka, kerejasama tu deka mekuh ngagai sukut teknologi enggau pemansang dalam ngasilka hidrogen.
Ku iya, Sarawak udah sedia deka nempa kerejasama berindik ari komitmen mantu dunya bekaul isu ubah klimate iya nya pengangat global ti majak balat.
“Reti nya, pekara ti uji deka dikenataika aku ba ditu iya nya pasal pengelebih Sarawak.
“Kitai bekerejasama dikena ngurangka karbon, rumah gadung ti meri empas.
Perintah Sarawak bejalaika atur nya enggau udah tentu kitai enda ulih bejalaika pengawa nya kediri aja,” ku iya.
Abang Johari madah munyi nya rambau pengerami makai lemai Pengawa Ngelancharka InvestSarawak enggau Hari Dagang Menua Serakup Eropah (EU) 2024 ke mega digulu 23 iku diligit EU.
Ku terang Abang Johari, sida (EU) ngembuan peneleba sereta teknologi, nyadi sida ulih nyerungaki kandang sekeda endur enggau mantu Sarawak sereta dunya.
Ku iya, bantu nya ukai ungkup Sarawak aja, ukai ungkup bala ketuai, tang ungkup mensia mayuh, nya mih tuju Perintah Sarawak.-TVS