SIBU, 15 Feb: Perintah Sarawak udah setuju deka ngaga lima jalai baru ba pelilih Sibu.
Sapit Menteri Pengerai Mensia Mayuh, Pengawa Berumah enggau Perintah Lokal Sarawak Datuk Michael Tiang Ming Tee madahka, Premier Sarawak Datuk Patinggi Tan Sri Abang Johari Tun Openg udah ngemendarka projek nya.
Ku iya, projek nya deka ngaul jalai besai ba sitak Lanang, Salim, Pelawan enggau ba Ulu Sungai Amang.
“Tu endang jalai baru enggau ukai projek nangkir jalai ti udah dikemendarka dua taun ke udah, ke ngaul Jalai Lanang-Palawan, Bukit Assek-Amang, Jalai Oya enggau Kampung Jeriah ke Pasai Siong,”ku iya maya dirandau raban media, apin lama.
Udah nya nerang silik pasal lima rentayan jalai alun baru nya, tandu iya, projek nya deka nyadika rentayan jalai alun ba Sibu majak ngerembai seraya ulih nyungkak pemansang mengeri tu.
“Jalai baru tu begunaka timpuh ambis nadai dua taun enggau udah dikemendarka ba baruh Langgur Pemansang Malaysia Lumpar ke-13,” ku iya.
Kelimpah ari nya, Michael Tiang madahka, iya mega sepenemu enggau Abang Johari sentang Sibu begunaka industri baru sereta ukai semina bepanggai ngagai sektor kayu batang aja.-TVS
