KUCHING, 15 Feb: InvestSarawak deka ngesan tangkup pengawa besai nyadi penyanding penemu dalam meri bantu sereta sukung ngagai semua pemeranak puku.
Sapit Premier Sarawak, Datuk Amar Awang Tengah Ali Hasan madahka, penumbuh entiti nya mega ngembuan tuju dikena nyeraris peminta pemeranak puku ti ngembuan juluk deka beranakka puku di nengeri tu.
“InvestSarawak, ba baruh MINTRED iya nya Palan ‘One-Stop’ti ngembuan tuju dikena ngubah landskap beranakka puku sereta nyungkak dagang enggau pematak bakat ungkup Sarawak.
“Sida deka ngesan tangkup pengawa besai nyadi penyanding penemu dikena meri penemu lokal ngagai semua pemeranak puku, sekalika ari menua luar tauka domestik,” ku iya.
Iya bejaku munyi nya rambau Pengerami Bejadika Investsarawak enggau Pengerami Makai Lemai Hari Dagang Menua Serakup Eropah 2024 ditu, malam tadi.
Nerang silik, Awang Tengah madah, integrasyen Sarawak dalam rintai asil global beguna bagi perintah nengeri dalam nyungkak asil domestik nengah strategi meranakka puku enggau dagang ti disaran ngambika Sarawak ulih mengkang besemekih.
Nengah infrastruktur ti manah, polisi perintah ti nyukung sereta penuduk ti strategik nengeri tu ba Asia Tenggara, tandu iya, Sarawak nyendiaka peluang ti nyelai ungkup pengawa dagang meranakka puku.
“Peluang nyelai di Sarawak enggau makit Eropah ti bisi mayuh macham nyendiaka potensi besai ungkup pengawa bekunsi ti sama bela meri penguntung dalam pengawa beranakka puku sereta dagang.
“Sekumbang 10 taun ke udah, bisi 19 iku beranakka puku ari EU di Sarawak, tebal agi ari Belanda, Belgium enggau Jerman sepenyampau RM10.66 bilion dalam sektor baka E&E, besi sereta produk petroleum,”ku iya.
Kelimpah ari nya, nerang pasal Hari Dagang EU 2024, Awang Tengah ke mega Menteri Dagang Antarabansa Enggau Meranakka Puku Sarawak madahka, achara nya ti ngempuru panel ari dalam enggau menua luar dikeandalka ulih nempa lebih mayuh langgur penemu sereta chara berunding ti baru dikena mantu sektor ekonomi enggau dagang Sarawak sereta EU.
Forum nya mega ngemataka bisi lebih 300 iku penyereta, ke ngaul lebih 100 buah serikat ari EU.-TVS
