SARATOK, 10 Feb: Pengawa nyuaka chek pampas tanag ungkup Projek Jalai ari Kampung Kupang ke Simpang Bajau mujur ningkah jaku kutuk sekeda raban bekaul enggau status ngaga jalai raya nya ngelama tu.
Kaban Kunsil Nengeri (ADUN) Kalaka Mohd Duri madah, isu jalai nya udah dikemana pengelama lima taun kelimpah nyadi modal politik penyakal maya pengawa bepilih kenyau taun 2019.
“Kelalu cherita didinga pasal jalai raya ari Kampung Kupang ke Simpang Bajau.
“Bisi orang madah nya semina lakun aja enggau nyebut utai macham-macham tang sehari tu ayan bukti ke amat ari Perintah Nengeri Sarawak enggau GPS.
“Nyadi GPS naka ulih ngaga jalai nya lalu penemuai Sapit Menteri (Infrastruktur enggau Pemansang Penyangkai Kapal Sarawak) Datuk Aidel Lariwoo sehari nya madahka semua KMKK udah dikangau lalu mendingka kediri penerang dibantaika ngagai sida pasal projek nya.
“Projek jalai nya deka ditinda ba suku kedua taun tu,” ku iya maya Pengawa Nyerahka Chek Pampas Tanah Projek Jalai ari Kampung Kupang ke Simpang Bajau diatur ba Diwan Masyarakat Sri Krian ditu,kemari.
Isu jalai nya endang suah dipelataka mensia mayuh ba media rama ngelama tu beduduk ari pendiau jalai nya ke balat rusak.-TVS
