SIBU, 3 Feb: Ulah apai iindai ti kelalu nurutka peminta anak dibanding enggau jeman suba entara pemar ke ditapi raban pengajar dalam ngiri penemu ke ngasi ba sekula diatu.
Menteri ba Opis Premier Sarawak, Dato Sri John Sikie Tayai madah bisi sekeda apai indai kempang ngerembaika pengawa pengajar ketegal pengajar nya ngerara penyalah ke udah dikereja anak sida.
“Diatu mayuh apai indai terus ngerembaika silibus ke mar ungkup matapelajar matematik ke nyangka tusah ngelui ari pengulih ditemu bala anak.
“Tang aku pechaya genap pekara ke udah digaga perintah udah diperesa dulu sebedau pekara nya dipejalaika,” ku iya.
John sikie ke mega Kaban Kunsil Nengeri (ADUN) Kakus madah munyi nya maya Pengerami Apresiasi Nembiak Tabika/Taska Opis Pemansang Raban Bansa (KEMAS) Parlimen Selangau ke diatur ba sebuah hotel ditu, sehari tu tadi.
Tandu John Sikie ulah apai indai ti ngelakka anak bemain gajet tauka telefon kelalu lama ngujungka pelajar anak balat kusut.
Nya alai, apai indai mesti terit baka patut natak jam anak bemain gajet enggau bepedaka internet.-TVS