KUCHING, 1 Feb: Gerempung Veteran Soldadu Kor Renjer (PVTKR) Pampang Sarawak minta perintah nengeri berundingka siti mosyen ke dibantaika sida ungkup raban veteran Soldadu Malaysia (ATM) ke kala nerima Pingat Jasa Malaysia (PJM) diberi elaun sekali bayar tauka ‘one off’.
Presiden PVTKR Pampang sarawak, Lt. Kol (B) Mohd Melintang Abdullah madah tuju meri elaun nya ngambika ulih mantu ngelempungka tating belanja raban penerima PJM berindik ari kos pengidup ke majak niki.
“Endang patut amat bala veteran ke kala nerima PJM tu dibayar elaun ‘one off’ nadai ngira penyampau lebih agi diatu kitai sama nemu ungkus pengidup nyau majak niki.
“Nyadi nyema bisi elaun one off tu nyangka ulih ngelempungka tating belanja sida bebelika barang guna ninting hari,” ku iya.
Melintang madah munyi nya maya dirandau Editor Berita Iban TVS, sehari tu tadi.
Ku terang Melintang, maya Aum Besai Gerempung Veteran Soldadu Kor Renjer (PVTKR) Ke-8 di Kuching kena 29 Januari tu tadi, dia semua kaban PVTKR bela meri tabi puji ngagai Tuai Pemegai Menua (TYT) Nengeri Sarawak Tun Dr Wan Junaidi Tuanku Jaafar laban udah dipadu nyadi TYT Nengeri Sarawak ke-8.
Berebak enggau nya, raban PVTKR enggau basa ke besai minta perintah nengeri berundingka jasa raban veteran ke udah berambunka nyawa maya bejalaika pengawa soldadu sereta nyaga pengelikun menua kitai Sarawak (kelia). -TVS