SARATOK, 20 Jan: Projek Ngaga Menasan Bedarat ba Sekula Sekondari (SMK) Saratok ke beungkus RM300,000 diatu dalam proses tinda.
Kaban Kunsil Nengeri (ADUN) Krian Friday Belik madah, enti nitihka langgur asal projek nya patut udah tembu beduduk ari tinda ke udah dibuka ba taun 2021.
Taja pia langgur nya puntan nyentuk ke diatu beduduk ari nadai siti kunteriktor deka nangkup projek nya.
Nya alai, ku iya, siti aum deka diatur enggau Opis Kereja Raya (JKR) Saratok dikena berundingka chara mutarka penanggul enggau nentuka projek ulih digaga enggau lengkas ke pemaik raban nembiak enggau staf sekula nya.
“Ba aku projek nya enda tentu pedis laban menasan sigi udah bisi.
“Semin pan udah bisi semina ngatapka agi,” ku iya.
Friday mansutka pekara nya rambau Pengerami Apresiasi Nembiak Pom 5 SMK Saratok, kemari.
Nangkan ke nya, ku Friday iya udah berandau enggau sida JKR senentang atur ke patut digaga sida udah tu.
Nya alai, iya melabaka ba suku keterubah tu projek nya deka ulih dipejalaika.-TVS
