DEBAK, 20 Jan: Penusah bah ke nyadi di pelilih Debak diatu kebendar empas ari ujan bangat ke berunggu enggau ukai ketegal penyadi ai pasang raya.
Sapit Menteri Pemansang Indu, Nembiak Mit enggau Pengelantang Komuniti Sarawak, Datuk Mohd Razi Sitam taja pia madahka penusah bah ke nyadi ba sitak nya ukai ba tikas ke pemadu balat.
“Penusah ampuh bah serak tu ketegal gaya ujan ti berunggu.
“Nyadi dalam timpuh dua, tiga hari tu. Ujan ke nyadi ba tunga barat, sepiak ulu enggau ba Debak ditu,” ku iya.
Razi ke mega Kaban Kunsil Nengeri (ADUN) Saribas madah munyi nya ngagai raban media pengudah ngabas genturung pendiau ke dituntung penusah ampuh bah sereta ngabas PPS di Debak, pagi tadi.
Ku terang Razi, diatu penyadi pasang raya semina 5.2 meter peninggi.
Nya alai, penusah bah ke nuntung menua nya diatu empai ba kategori ke balat laban sebedau tu ai bah kala betatam nyentuk lima hari pengelama dibanding diatu semina sehari lalu paras ai udah surut taja ai pasang raya.
Berebak enggau nya, Razi madah penyampau perayat tebunsa ngenduh ba dua Palan Pengenduh Sementara penyampau 364 iku.
Semua sida ke tasah bah nya datai ari tiga buah genturung pendiau iya nya Kampung Lalang, Kampung Bungey enggau Kampung Babu.-TVS
