ENGKILILI, 19 Jan: Sapit Menteri Pengerai Malaysia Datuk Lukanisman Awang Sauni meransang raban staf Opis Menteri Pengerai Malaysia (KKM) di nengeri tu patut lebih kreatif enggau inovatif dalam bejalaika tanggungpengawa diri.
Ku iya, lebuh beratika sekeda pelin pemansang ba nengeri bukai baka di Sabah, Pahang sereta Terengganu sida mega bisi ngemanahka klinik repuk.
Beduduk ari nya, ku iya staf KKM di Sarawak patut bisi pelin pemansang diri empu nengah kreativiti enggau inovasyen ari pemisi agih belanja ke udah diberi.
“Kitai (KKM di Sarawak) begunaka pelin pemansang diri empu lalu kitai patut lebih kreatif enggau beinovasi ari pemisi agih belanja,” ku iya.
Lukanisman ke mega Kaban Parlimen Sibuti madah munyi nya nyerumba pejalai gawa ke Klinik Pengerai Skrang, ditu kemari.
Nangkan ke nya, iya madah jam ke diatu pengawa ngemanah klinik repuk di Sarawak mesti dirumban.
Nya alai, sebengkah polisi ke lebih manah patut digaga di nengeri tu dudi jari dikena ngemujurka juluk nya.
“Kenyau ari renggat pejalai keterubah taun nyin kemari enggau renggat kedua dalam seminggu dua tu nyadi kitai meda chukup nyata klinik pengerai di nengeri tu enda tau enda diadu manah.
“Mesti bisi siti polisi ke lebih manah dikena ngaduka klinik repuk ke sitak menua pesisir,” ku iya nerang nyemetak.
Klinik Pengerai Skrang ke bepalan semak Jalai Raya Pan Borneo jam ke diatu bisi nerima urung 30 iku pesakit dalam sehari.
Penyampau nya disadang terus nambah beduduk ari Jalai Raya Pan Borneo ke udah tembu lalu ngemuntangka peranak rumah panjai ke diau besemak datai ngulihka servis pengerai.-TVS
